Bidasoaren fauna urtarra, LIFE IREKIBAI proiektuaren argitalpen berrian

Ingurumenerako Zuzendaritza Nagusiak Bidasoaren Arroko Fauna Urtarra izenburuko argitalpen berria aurkeztu du 2018ko abenduaren 20an. Liburuan ageri dira aipatu arro horretako ibai eta errekei loturik bizi diren animalia espezie nagusiak. Egileak Nafarroako Unibertsitateko adituak dira; Zientzia Fakultateko Ingurumen Biologia sailekoak, hain zuzen. Halaber, Nafarroako Gobernuko Ekonomia Zirkularraren eta Uraren Zerbitzuko teknikariak aritu dira lankidetzan, bai eta GAN-NIK Nafarroako Ingurumen Kudeaketa enpresa publikokoak ere. Hain zuzen ere, enpresa hori arduratu da gida koordinatzeaz eta argitaratzeaz, LIFE IREKIBAI Europako proiektuaren baitan: Ibai irekiak: Nafarroak eta Gipuzkoak partekatzen dituzten ibaien konektibitate eta habitaten hobekuntza. Nafarroako Gobernua partaide da proiektuan.

Ibaiari atxikitako faunaren ezagutzan sakontzea

Naturazaleendako landa-gida izatea da argitalpenaren helburua, ibaiari atxikitako fauna ezagutu eta ezagutza horretan sakontzea ahalbidetzen baitu.

Liburuak 23 makro-ornogabe talderen deskribapena eta xehetasunak bildu ditu fitxa espezifikoetan antolatuta (sorgin-orratzen larbak, ibaietako kakalardoak, moluskuak, krustazeoak, etab.). Ornodunen atalean, hegazti, narrasti, anfibio, arrain zein ugaztunen 45 espezie bildu dira guztira. Espezie hauek ibai-ibilguen beharra dute bizirik irauteko, beraien ziklo biologikoko etaparen bat uretan egiten dutelako edota ibai-ibilguei lotutako biologia dutelako.

Liburua osatzen duten 200dik gora orrialdeetan, espezie bakoitzaren deskribapenarekin batera, banaketari buruzko datuak eta biologiari buruzko zein kontserbazio-egoerari buruzko zehaztapenak aurki daitezke, horren ezagutza errazten duen oinarrizko informazioa bilduz.

Guztira, 1.000 ale argitaratu dira gaztelaniaz eta beste 1.000 ale euskaraz, proiektuari atxikitako jarduketa-esparruan banatzeko. Liburuaren online bertsioa LIFE IREKIBAI proiektuaren webgunean eskura daiteke: https://www.irekibai.eu/

Gidaren aurkezpena, Life Irekibai proiektuan egiten ari den herritarren partaidetza prozesuaren Jarraipen Batzordearen bilera berri baten barruan egin da. Batzorde hau Nafarroako kantauri eremuko toki erakundeen ordezkariek, Kantauriko Konfererazio Hidrografikoak, Cederna-Garalurrek eta foru Exekutiboak osatzen dute.

Gehiago Irakurri