Gipuzkoako Foru Aldundiko hainbat teknikari arrainendako esklusak ikustera joan dira Santa Eulaliara (Zamora) eta Maulera (Zuberoa-Frantzia). Helburua izan da diseinuen ezaugarriak ikustea, eta mantentze-lanetan nahiz eraginkortasunean, etab. duten esperientziatik ikastea. Informazio hori oinarri, arrainendako esklusa baten diseinua amaitzen ari da Olaberriko presan, hau da, izokinek itsasotik gora doazela gainditu behar duten lehen oztopoan.

Zamoran, berriz, Esla eta Duero ibaietako hainbat instalazio ikusi dituzte. Santa Eulalia de Tábarako esklusak du zerikusirik handiena Leitzaranerako proposamenarekin. Ezohiko gailua da, aitzindaria Penintsulan, eta oso aproposa arrainek 9 metroko desnibela gainditu dezaten, baita igeri egiteko gaitasun urria dutenek ere.

Azalpenei esker, instalazioaren funtzionamendua ulertu dute, eta bereziki, nola erregulatzen diren uhateak, arrainak ahalik eta erarik eraginkorrenean igaro daitezen. Era berean, bestelakoak ere ikusi dituzte, hala nola arrainen pasaera kameren bidez kontrolatzeko sistema; esklusa barruko argiztapena, esklusa arrainentzat erakargarriagoa izan dadin; eta barnera sartzeko erregistroak, dagozkion mantentze lanak egiteko.

Maule-Lextarren, berriz, arrainen jarraipena egiteko tresnak ikustera joan dira. Arrainendako eskala bat baitute, eta jarraipena egiteko sistema bat kameretan oinarriturik, eta era berean, irudiak informatikoki prozesatzeko sistema bat arrainak atzemate aldera.

Trukaketa teknikoaren osagarri, Mauleko arduradunak Olaberrira joan dira bisitan, jarraipenerako proposamenak han bertan eztabaidatzeko. Topaketen emaitza oso pozgarria izan da, proposamen interesgarriak egin baitira hala diseinuan nola mantentze lanetan, eta halaber, proiekturako harreman interesgarriak egin dira.